Ambilan Minggu, 04 Februari 2024 (Sexagesima)
Teks : Jesaya 40:21-31
Doding : Haleluya No. 472:1-2
Topik : Jahowa Aima Naibata Sisadokahni dokahni
I. Parlobeini
Jesaya aima sahalak Nabi hun Juda (Israel Selatan) namangidangi bani panorang pamarentahan raja Uzia, Yotam, Ahas, pakon Hizkia (Jes. 1:1). Kitab Jesaya on ibagi bani tolu bagian, na parlobei aima bindu 1-39 (Proto Jesaya) na memiliki latar belakang situasi paima bangsa Israel tarbuang hu Babel. Bagian paduahon bindu 40-55 (Deutro Jesaya) aima panjahaion Jesaya pasal panorang bangsa Israel tarbuang i Babel. Patoluhon aima bindu 56-66 (Trito Jesaya) na manggambarhon situasi bangsa ampa na sibahenonni bangsa ai sanggah luar hun Babel. Marhiteihonni ai, konteks situasi teks ambilanta bani panorang on aima panorang bangsa Israel ibagas parjabolonan Babel, na mambahen bangsa Israel tarsosak ampa seng dong pangarapan.
II. Hatoranganni
Anggo i pardiatei hita teks ambilanta on, mungkin dong sungkun-sungkun banta mase ma bani ayat 21-31 penekananni pasal seng dong Naibata na margogoh janah seng dong naibata na legan sobali Jahowa. Khususni boi ididah hita bani ayat 25, "Bani ise do pausihonnima Ahu, anjaha usih hu hujai, nini Na Ma Pansing in?" Boi hatahononkon teks ambilanta on sihol mengkritisi mentalitas haporsayaon na ihagoluhkon sidea paima i habuangan Babel na marosuh marnaibata na legan. Dommu huajima Jesaya sihol pasingatkon sidea sanggah i bagas habuangan on ase ulang be sonai. Bani panorang ijia nabi Jesaya mandompakkon pamarentahan Raja Ahas na marparlaho so talup i lobeini Naibata marhiteihon, "Ia pe itutung do anakni bahen galangan romban hu bani adat hagigian ni bangsa-bangsa, na pinabali ni Jahowa i lobei ni halak Israel. Ambahni ai manggalang anjaha manutung dahupa do ia bani ianan panumbahan, na i atas buntu-buntu, i atas dolog pakon i toruh ni ganup hayu na ratah." (2 Raja-raja 16:3b-4).
Sejarah parugamaon ni sidea na marnaibata na legan gabe alasan utama mambahen sidea tarbuang hu Babel. Memang sanggah panorang Hiskia bangkit gabe raja dong do pembaharuan parugamoan i tongah-tongah harajaon Juda, marhiteihon parsedahon panumbahan, mambolahi gana-gana, manroboh Ashera pakon na manrosaki ulog tombaga (2 Raja-raja 18:3-4). Tapi dob honsi Hiskia i gantihkon niombah ni aima na margoran Manasye, mulak do use bangsa ai manombah naibata na legan, janah gabe roh parahni do, "Ai iulaki raja ai do paulihon panumbahan na i atas buntu-buntu, na dob pinarseda ni si Hiskia, bapani ai; anjaha ipajongjong do anjapanjap bani baal, i bahen do sada Ashera, songon na binahen ni si Ahab, raja ni Israel, isombah do ganup bala ni langit anjaha ibalosi do ai. Itutung do anakni bahen galangan, ihorjahon do hadatuon pakon partondungon, anjaha ipiara do halak paniaran pakon sipanjahai. Buei do sogam ni uhur ni Jahowa ihorjahon, laho mamuhoi ringis-Ni. Anjaha ipauli do gana-gana Ashera, anjaha inahkon ma ai i Rumah ni Jahowa;" (2 Raja-raja 21:3;6-7a).
Torus do sidea marnaibata na legan das bani panorang raja Joyakim, na ija sanggah pamarentahon on ma Nebukadnesar manlawan Juda janah on ma gelombang habuangan na parlobei hu Babel. Sasintongni bani pamarentahan Joyakim on, Nabi Jeremia domma pasingatkon sidea ase ulang marnaibata na legan tapi totap do seng mubah paruhuranni sidea. "Ulang ma ihutkon hanima naibata na legan, laho mambalosisi ampa marsombah hujai, anjaha ulang ma puhoi hanima ringis-Ku marhitei horja-horja ni tangannima, ase ulang Huparoh hasedaon bannima. Tapi seng itangihon hanima Ahu,”nini Jahowa, “Gabe ipuhoi hanima do ringis-Ku marhitei pambahenan ni tangannima, na gabe hamagouan bannima sandiri. Tonggor ma, parohon-Ku ma bangsa-bangsa par utara,”nini Jahowa, “Ampa si Nebukadnesar, raja ni Babel, juakjuak-Kai, boanon-Ku ma sidea mandorab tanoh on ampa sagala pangisini ampa dompak ganup bangsa-bangsa inggot; boiskonon-Ku do sidea, bahenon-Ku do sidea gabe songgot-songgot, sipahirion ampa siapason tongtong" (Jeremia 25:6-7,9). Jadi, boi ididah hita mulai pamarentahan Ahas-Joyakim (total raja mulai Ahas-Joyakim aima 7 raja janah 144 tahun 3 bulan ma gunup total pamarentahan na pitu raja ai) seng dong hamabubahonni uhur na permanen i tongah-tongah harajaon ai. 144 tahun 3 bulan ma ibere Naibata panorang ni sidea marhamubahonni uhur ase lang be marnaibata na legan. Domma isuruh Naibata do homa Jesaya pakon Jeremia padaskon panjahaion na ijalo sidea ase bangsa Juda in mulak bani Naibata janah seng gabe jabolon i Babel. Tapi totap do sidea sonin, makani ai teks ambilanta bani Jesaya on sihol pasingatkon sidea sangah i habuangan Babel ase ulang be marnaibata na legan songon na hinan.
III. Hahonaonni
1. Topik mingguta mangkatahon,"Jahowa aima Naibata sisadokahni dokahni." Maningon i parimbagaskon hita do kalimat on janah ra marlajar bani pengalaman harajaon Juda ai. Bahasa sikap sidea na marnaibata na legan parohkon hamagouan do bani pargoluhanni sidea sandiri janah mangarahkon bani parjabolonan i Babel. Nai do homa hita, anggo sangsi do hita bani hagogohan ampa pambahenan ni Naibata marhiteihon marpangajaman bani naibata na legan atap kuasa dunia on, sisoya-soya do hapeni in ganupan.
2. Songon na tarsurat bani ayat 26, maningon ra do hita mangkawah hu babou, ise do tongon na manompa ganupan in? Sipata hita fokus mangkawah bani masalah na idompakonta janah in parohkon hasangsian ampa hagobiron ibagas uhurta. Porlu tumang do hapeni hita marhaundukon ni uhur mangkawah bani ganup na binahenni Naibata ibagas pargoluhanta on. Anggo porsaya do hita paboa Jahowa aima Naibata sisadokahni dokahni, maningon porsaya do homa hita bahasa anggo hinan ia mampardiateihon hita, pasti nai do torus Ia hu lobeianni ari on, naha pe banggal atap bueini paruntolonta, totap do Naibata mampardiateihon hita halani ia aima Naibata na seng mubah-ubah. Nas ta on sihol pasingatkon hita seng dong Naibata na legan sobali Jahowa, janah nai do homani seng dong pangurupion na sintong sobali na roh humbani Naibata Jahowa. Totap ma hita roh hu Bani.
0 Komentar